Навистина е тешко да се одлучи вистинското време кога треба да го запознаете вашето дете со магичниот универзум на „ Војна на ѕвездите”, но Дизни само што ви ја олесни таа задача. Од студиото објавија дека лансираат нов серијал на детски кратки анимирани филмови наречен „Star Wars Galaxy of Adventures“.
Првите шест кратки филмови се појавија на 30 ноември на YouTube каналот Star Wars Kids. Овој нов серијал е очигледно наменет за најмладите потенцијални фанови на „ Војна на ѕвездите “. Децата обично се многу позаинтересирани за кратки епизоди од 10 до 20 минути, отколку за долгометражни филмови, па затоа студиото Дизни реши дека најдобриот начин за запознавање на децата со класичните приказни од универзумот на „ Војна на ѕвездите “ е преку кратки анимирани филмови кои ќе се прикажуваат на YouTube.
„Низ текот на годините многу пријатели ми кажаа дека им е многу тешко да ги запознаат нивните деца со „ Војна на ѕвездите “ бидејќи не знаат дали децата ќе бидат подготвени за гледање толку долги филмови“, вели Џејмс Вон, потпретседателот на Lucasfilm.
Лансирањето на каналот Star Wars Kids всушност покажува од колкаво значење се децата за Дизни, без разлика на тоа што главниот профит доаѓа од долгометражните филмови. Студиото продуцира неколку долгометражни филмови кои ќе излезат во текот на наредните неколку години, но и две телевизиски серии кои ќе ја обработуваат тематиката на „ Војна на ѕвездите “ универзумот.